Njerëzit që jetojnë në komunitete të largëta indigjene janë po aq të lumtur sa ata në vendet e zhvilluara të pasura, sipas hulumtimeve të reja shkencore që mund të sfidojnë perceptimin gjerësisht se “paraja blen lumturinë”.

Studiuesit që intervistuan 2.966 njerëz në 19 komunitete indigjene në të gjithë botën zbuluan se mesatarisht ata ishin po aq të lumtur, nëse jo edhe më të lumtur, sa personat me të ardhura të larta në vendet perëndimore.

“Çuditërisht, shumë popullata me të ardhura monetare shumë të ulëta raportojnë nivele mesatare shumë të larta të kënaqësisë nga jeta, me rezultate të ngjashme me ato në vendet e pasura. Unë do të shpresoja që, duke mësuar më shumë rreth asaj që e bën jetën të kënaqshme në këto komunitete të ndryshme, mund të ndihmojë shumë të tjerë që të bëjnë jetë më të kënaqshme duke adresuar krizën e qëndrueshmërisë”, tha Eric Galbraith, autori kryesor i studimit i cili u botua në revistën shkencore Proceedings of the National.

Studimi nga Instituti i Shkencës dhe Teknologjisë Mjedisore i Universitat Autonoma de Barcelona (ICTA-UAB), zbuloi se njerëzit në 19 komunitetet e izoluara raportuan një “rezultat mesatar të kënaqësisë nga jeta” prej 6.8 nga 10.

Sipas studimit, katër nga komunitetet e vogla raportuan rezultate mesatare të lumturisë prej më shumë se 8, që është më e lartë se ajo e gjetur në Finlandë, vendi më i vlerësuar, me një mesatare prej 7.9 .

Këto katër komunitete janë Kolla Atacameña në Argjentinë (8.0); Pãi Tavyterã/Guarani në Paraguaj (8.2); Riberinhos në Brazil (8.4) dhe fermerë në Malësitë Perëndimore të Guatemalës (8.6). Në Malësitë Perëndimore, 30 nga 70 personat e intervistuar dhanë një përgjigje 10/10 kur u pyetën për kënaqësinë e tyre nga jeta.

Gjetjet e studimit tij janë “lajm i mirë për qëndrueshmërinë dhe lumturinë njerëzore, pasi ato ofrojnë prova të forta se rritja ekonomike me burime intensive nuk kërkohet për të arritur nivele të larta të mirëqenies subjektive”.

“Korrelacioni i fortë i vërejtur shpesh midis të ardhurave dhe kënaqësisë së jetës nuk është universal dhe dëshmon se pasuria, e krijuar nga ekonomitë e industrializuara, nuk është thelbësore që njerëzit të bëjnë jetë të lumtur”, tha Victoria Reyes-Garcia, autore e lartë e studimit./ The Guardian