Durrës, bulevardi “Epidamn” kthehet në hapësirë për këmbësorët gjatë sezonit turistik

ATSH/ Në kuadër të masave për mbarëvajtjen e sezonit turistik, Bashkia e Durrësit njofton të gjithë qytetarët se bulevardi “Epidamn” do të kthehet në një hapësirë pedonale nga data 29 qershor deri më 15 shtator, prej orës 19:00 deri në 23:00, me qëllim lehtësimin e lëvizjes së qytetarëve dhe vizitorëve të shumtë që vijnë për të kaluar pushimet.

Bashkia e Durrësit sqaron se ky vendim vjen duke patur parasysh që vitin e kaluar kjo nismë u mirëprit nga qytetarët dhe bizneset.

“Këtë vit është menduar të zgjatet më shumë afati kohor i ndalimit të mjeteve për të reduktuar trafikun dhe krijuar hapësira për këmbësorët. Për këtë qëllim njoftojmë se: Ndalohet qarkullimi dhe parkimi i automjeteve në bulevardin “Epidamn” (segmenti nga Prefektura deri tek Torra Veneciane) nga data 29.06.2024 deri më 15.09.2024, prej orës 19:00 deri në 23:00.

Për t’i ardhur në ndihmë fluksit të automjeteve, do të bëhen ndryshimet e mëposhtme në akset rrugore: Rruga “Karl Topia” dhe rruga “Gjergj Komnino” do të kenë një sens lëvizjeje (ngjitja drejt Vilës së Zogut). Rruga “Telha Çela” dhe rruga “11 Dëshmorët e Stanit” do të kenë një sens lëvizjeje (zbritja në drejtim të Muzeut të Dëshmorëve)”, njofton Bashkia e Durrësit.

Po ashtu, do ndalohet parkimi i automjeteve përgjatë orarit 19:00-23:00 nga data 29.06.2024 deri më 15.09.2024 në: Rruga “Anastas Durrsaku” (segmenti nga Kisha Ortodokse – Shkolla Gjergj Kastrioti). Rruga “Hysen Matlija” dhe rruga “Mbretëresha Teuta” (Shkolla Italiane), ndalim parkimi nga një krah lëvizjeje. Rruga “Karl Topia” dhe rruga “Gjergj Komnino”, ndalim parkimi nga një krah lëvizjeje. Ndalohet parkimi i automjeteve gjatë gjithë ditës në: Rruga “Taulantia” në njërin krah të rrugës (segmenti nga karburanti “Kastrati” deri te kryqëzimi i shkollës Italiane) nga data 29.06.2024 deri më 15.09.2024″, vijon njoftimi.

Bashkia e Durrësit shpreson në mirëkuptimin e drejtuesve të mjeteve, teksa i bën ftesë të gjithë qytetarëve të lënë makinat dhe të shijojnë shëtitjet në këmbë në bulevardin kryesor të Durrësit gjatë këtyre mbrëmjeve verore.

Rreth autorit

Aldo Mustafa

U lind më 6 janar 1996 në qytetin e Durrësit.
Studimet Bachelor i ka përfunduar në Durrës pranë Fakultetit të Edukimit për degën Gjuhë-Letërsi-Anglisht, në universitetin "Aleksandër Moisiu", ndërsa Masterin Shkencor e ka përfunduar po në degën Gjuhë-Letërsi-Anglisht, profilizuar për letërsi.

Gjatë studimeve universitare do të niste të shkruante një vëllim me përralla, të cilat në thelb do të kishin mitologjinë shqiptare dhe krijesat e saj, parë ndryshe nga autori me një version të origjinës së tyre dhe sesi ato ishin krijuar, bashkë me mitet aktuale të njohura. Vëllimi do të përfshinte gjashtë përralla me ilustrime, të grupuara në dy trilogji.

Njëkohësisht me përrallat do të shkruante komedinë dhe librin e tij të parë “Komedia gjyqësore”, botuar më 2018, ditën e diplomimit të tij. Zhaneri i komedisë do të ishte sprovë për shkak të popullaritetit të pakët dhe mungesës së kulturës për dramaturgjinë.

Pas botimit të librit të parë, menjëherë do të publikohej një prozë e shkurtër e kategorizuar në “Kohërat e kolerës” nga autorja e mirënjohur Arlinda Guma, në web-in e saj DEFEKT-TEKNIK. Ajo do ta redaktonte dhe më pas ta publikonte prozën e titulluar “30 vjet amnezi në 100 vjet vetmi”, shkrim ky, ndikuar nga autori G. G. Marquez, referuar situatës politike, ekonomike dhe kulturore në 30 vitet e fundit të demokracisë në vend. Shkrimi do të korrte sukses dhe do të botohej në disa portale.

Aldo Mustafa do të botonte një numër të konsiderueshëm artikujsh kulturor të cilat do të përfshinin intervista me studiues të letërsisë, intervista me profesorë të kërkimeve shkencore, përkthime të ndryshme të fjalimeve dhe intervistave me shkrimtar të huaj dhe të fjalimeve inspiruese.

Është pjesëmarrës në disa konferenca studentore, trajnime dhe shkolla verore të cilat trajtojnë “Sfidat e përfshirjes së Shqipërisë në Bashkimin Europian”.

Prej 2019 Aldo Mustafa ushtron profesionin e gazetarit të terrenit, ku fillimisht ka nisur punë pranë Syri Tv, me themelimin e televizionit të ri, më pas punoi paralelisht për gazetën Bulevard News, ndërkohë që kreu një sër investigimesh në bashkëpunim me Porta Vendore, projekt i mbështetur nga Ambasada Zviceriane. Një ndër bashkëpunimet e radhës në gazetarinë investigative, do të ishte dhe ai me Ambasadën Amerikane e cila financoi projektet të Investigative Network Albania me temë "Drejtësia e munguar, vetëm 1 i dënuar me shërbim prove për 51 viktimat e tërmetit" i cili i zhvillua në formën e një minidokumentari. Prej vitit 2021, Aldo Mustafa është gazetar pranë Report Tv.

https://revokult.com

Më shumë postime

28/01/202428/01/2024