POEZI NGA ANDI MEÇAJ

FILXHANI I ÇAJIT

U zhyta në një filxhan me çaj,

piva ca gllënjka pa sheqer,

noto e noto dola në buzën tjetër,

noto e noto dola sërish

në buzën e parë,

dola nga uji,

u thava në diell.

Erdhe ti, u zhytëm

sërish në çaj,

noto e noto më the se

do ikësh,

noto e noto më the se

nuk më do më,

noto e noto më the se

fëmijët mund t’i mbaja,

noto e noto më the se

nuk doje as një gjë

nga unë,

noto e noto më the se

i kishe bërë gati valixhet

me gjërat e tua,

noto e noto më the se

ky ishte takimi ynë i fundit,

noto e noto ti dole

në buzën tjetër,

noto e noto unë dola

në buzën e parë.

Dola nga uji, thyeva

gjithë filxhanët e çajit

dhe nuk të mendova më.

Shkurt 2024