Një varrezë e periudhës mesjetare është zbuluar së fundmi në Forumin Bizantin të qytetit të Durrësit. Dokumentimi i kësaj varreze që përkon në këtë periudhë, zgjeron më tej informacionet, pasi sipas Brikena Shkodrës, deri më tani, ka të dhëna sporadike. Gjithashtu transformimi i kësaj hapësire ndër shekuj, e kthen këtë objekt, në një qendër të ekspeditave dhe arkeologëve të cilet kërkojnë të interpretojnë dhe detajojnë copëzat e historisë.

Tashmë prej mëse një jave, Arkeologe Brikena Shkodra së bashku me grupin e ekspeditës, kanë nisur gërmimet në këtë forum për të disatin vit radhazi, me shpresën se ende ka të dhëna të cilat do të plotësojnë dhe faktojnë historinë e një qytetërimi të lashtë.

Forumi Bizantin i Durrësit, i vendosur pranë Teatrit Aleksandër Moisiu, është një nga monumentet më të rëndësishme historike dhe arkeologjike të Shqipërisë. Ky sit përfaqëson një pjesë të trashëgimisë së pasur bizantine të qytetit, e cila ka nxjerrë në dritë një mori zbulimesh gjatë viteve, që dëshmojnë për një të kaluar të pasur kulturore dhe historike.

Një nga zbulimet më të rëndësishme të bëra vitin e kaluar në këtë sit erdhi nga grupet arkeologjike franceze, të cilat zbuluan një statujë të vogël, një objekt me rëndësi të madhe artistike dhe historike. Ky zbulim, së bashku me të tjera të bëra gjatë viteve të kaluara, si fragmente të strukturave arkitektonike dhe objekte të ndryshme të përditshmërisë së periudhës bizantine, kanë kontribuar në ndërtimin e një tabloje më të qartë për rolin dhe funksionimin e këtij forumi në atë kohë.

Zbulimet franceze të vitit të kaluar kanë ndihmuar në përcaktimin e shtresëzimeve kulturore të sitit, duke zbuluar detaje të rëndësishme mbi zhvillimin urban dhe jetën sociale të qytetit gjatë epokës bizantine. Gjetjet kanë përfshirë elemente dekorative, monedha, dhe fragmente të qeramikës që ndihmojnë për të kuptuar më mirë lidhjet tregtare dhe kulturore të Durrësit me pjesë të tjera të Perandorisë Bizantine.

Ekspedita e re e drejtuar nga Brikena Shkodra synon të zgjerojë më tej njohuritë mbi këtë sit dhe të zbulojë artefakte të tjera që mund të jenë ende të fshehura. Ajo ka theksuar rëndësinë e mbrojtjes së këtij thesari arkeologjik dhe të vazhdimit të bashkëpunimit me arkeologë të huaj për të siguruar që këto zbulime të trajtohen me kujdes dhe profesionalizëm të lartë.

Forumi Bizantin mbetet një pikë kyçe në historinë e Durrësit, dhe zbulimet e kryera deri më tani jo vetëm që pasurojnë njohuritë tona për të kaluarën e qytetit, por edhe nxisin kërkime të reja për të nxjerrë në pah më shumë fakte dhe të dhëna historike.