Nga Dëshira Jazexhiu Shehu

“Një mijë dashuri” i autorit të njohur Xhevahir Spahiu, sjell një koleksion të pasur me vjersha që rezonon me zemrat e lexuesve të vegjël. Ky libër u botua me mbështetjen nga Fondi për Krijimtarinë Letrare për Fëmijë 2024 të Qendrës së Librit dhe Leximit në Tiranë.

I përzgjedhur me kujdes nga një juri e përbërë nga ekspertë të letërsisë për fëmijë, u vlerësua për mënyrën e ndjeshme dhe të thellë se si e trajton dashurinë si një ndjenjë të përhershme dhe universale.

Nëpërmjet vjershave të tij, Xhevahir Spahiu shpalosë dashurinë në shumëllojshmërinë e saj; si ndjenjë për prindërit, për shokët, për kafshët, për natyrën dhe për veten. Çdo poezi në këtë libër është si një dritare që hap një univers të vogël, ku fëmijët mund të ndihen të përfshirë, të kuptuar dhe të frymëzuar për të dashur. Ndër rreshtat e ngrohtë dhe të ndjerë, fëmijët gjejnë jo vetëm dashuri, por edhe mesazhe të thella për ndjeshmërinë, përkujdesin dhe mirësinë ndaj të tjerëve, duke mësuar se dashuria nuk është thjesht ndjenjë, por një akt që pasuron jetën e përditshme dhe marrëdhëniet.

Libri është ndërtuar me një stil poetik të veçantë që përshtatet me botën e brendshme të fëmijëve dhe i fton ata të kuptojnë më mirë ndjenjat e tyre. Këto vjersha nuk synojnë vetëm të argëtojnë, por edhe të nxisin reflektim e vetëdije për rëndësinë e dashurisë në një botë shpesh të zënë e të largët. Duke lexuar, fëmijët udhëtojnë nëpër një botë ku dashuria është ajo që lidh zemrat e vogla me ndjenjat e mëdha dhe i fton të rriten me ndjenja të pastra dhe të qëndrueshme.

Në këtë vepër, dashuria shfaqet si një urë që lidh jo vetëm njerëzit mes tyre, por edhe ndjenjat e ndryshme që ata përjetojnë. Çdo poezi përshkohet nga një dritë e veçantë, që shërben si një udhërrëfyes për fëmijët në rrugëtimin e tyre emocional dhe i ndihmon ata të zbulojnë forcën e ndjeshmërisë dhe rëndësinë e mbështetjes për njëri-tjetrin. Ky libër mbetet një shoqërues i çmuar për të vegjlit, duke i ftuar ata të përqafojnë dashurinë në të gjitha format dhe duke krijuar një botë më të mirë, më të ndjeshme dhe më të bashkuar përmes fuqisë së poezisë.