Në episodin më të fundit të RevoCast, Elios Shuli ndau emocionet dhe pritshmëritë për projektin e tij më të afërt muzikor, këngën “Gjallë”, një bashkëpunim me këngëtarin Jet, i cili do të jetë pjesë e Festivalit të 63-të të Këngës. Ky projekt shënon rikthimin e tij si autor në këtë festival, pas një mungese të detyruar nga mospranimi i projekteve të tij në edicionin e kaluar.

Elios nuk e fshehu kënaqësinë që këtë vit, organizimi i festivalit ka kaluar në duar të reja:
“Jam shumë i lumtur që gjithë skuadra organizuese e këtij festivali ka ndryshuar, sepse më është bërë një dëm shumë i madh me projektet që nuk m’u pranuan vjet.”

Ky ndryshim ka rilindur shpresën tek artistët dhe autorët që kanë hasur vështirësi me proceset e mëparshme. Për Eliosin, kjo është një mundësi për të treguar talentin e tij dhe për të realizuar një ëndërr të mbetur pezull.

“Gjallë” – Një mesazh që frymëzon

Sipas tij, kënga “Gjallë” është një projekt me energji pozitive dhe një mesazh të fortë. Shuli shprehet se përmes këtij bashkëpunimi, synon të prekë audiencën dhe të rikthejë besimin në vlerat e muzikës së mirëfilltë.

Ky projekt nuk është thjesht një këngë, por një simbol i qëndrueshmërisë dhe dëshirës për të triumfuar pas pengesave të së kaluarës.