Ujësjellës Kanalizime Rajoni Durrës ka përfunduar me sukses punën për zëvendësimin e një saraçineske të dëmtuar në lagjen 16 të qytetit. Saraçineska, me dimensione 500 mm, është një element thelbësor për manovrimin e ujit në rrjetin shpërndarës të qytetit, duke siguruar furnizimin e qëndrueshëm të të gjitha lagjeve.

Në këtë zonë, uji shpërndahet nga dy stacionet kryesore të pompimit dhe, sipas grafikut të miratuar, arrin në çdo lagje të qytetit. Dëmtimi i kësaj saraçineske kishte shkaktuar vështirësi në menaxhimin dhe furnizimin e rregullt me ujë, duke kërkuar ndërhyrje të menjëhershme nga ekipet teknike.

Punimet për zëvendësimin e saj kanë zgjatur disa orë, gjatë të cilave grupi i punës ka ndërhyrë për të zgjidhur problemin dhe për të garantuar funksionimin normal të sistemit. Pas përfundimit të procesit të zëvendësimit, Ujësjellës Kanalizime është duke punuar për rikthimin në gjendjen e mëparshme të pjesës së rrugës që u hap për kryerjen e kësaj ndërhyrjeje.

Ky investim i shpejtë dhe i domosdoshëm dëshmon angazhimin e Ujësjellës Kanalizime për të ofruar shërbime të pandërprera dhe për të përmirësuar cilësinë e furnizimit me ujë në qytetin e Durrësit.