Veshjet popullore të Gjirokastrës janë kthyer në një element të rëndësishëm të identitetit kulturor dhe një aset të çmuar për turizmin në zonë.
Familjet gjirokastrite po angazhohen për të restauruar dhe ruajtur kostumet e tyre popullore, të trashëguara brez pas brezi, duke synuar që këto vlera të veçanta të përcillen tek të rinjtë.
Mjeshtrja e njohur e qëndisjes tradicionale, Lizeta Hatika, thekson se interesimi për restaurimin dhe mirëmbajtjen e veshjeve karakteristike të zonës ka ardhur gjithnjë e më shumë në rritje, duke pasqyruar trashëgiminë e pasur të qytetit të gurtë.
Qëndistarja gjirokastrite evidenton faktin se ka restauruar veshje popullore me moshë dhjetëra vjeçare duke bërë të mundur ruajtjen dhe transmetimin tek brezat e rinj të këtyre vlerave. Ajo e cilëson të domosdoshme mirëmbajtjen e veshjeve karakteristike të vjetra si simbolika të traditës sonë popullore.
“Duhet të mblidhemi të gjithë atizanët dhe të marrim përsipër pjesët për secilin që na takon për t‘i rindërtuar veshje ashtu siç kanë qenë dhe ashtu siç duhet të jenë“, u shpreh Hatika.
Gjirokastra është ndër zonat më të pasura të Shqipërisë sa i përket folklorit dhe trashëgimisë etnografike. Kostumet popullore janë një nga simbolet më autentike të kësaj kulture, duke pasqyruar mjeshtërinë dhe traditën e brezave të shkuar.