International Fashion Week Albania solli një mbrëmje plot shkëlqim në një nga resortet më të njohura të Bashkisë Shijak, Ajman Park, duke mbledhur emra të famshëm nga bota e modës, showbizit, aktrimit dhe artit. Ky event i organizuar nga Blerta Kasalla dhe Endri Cuka shënoi një tjetër moment të rëndësishëm për industrinë e modës në Shqipëri, duke u zhvilluar nën kujdesin e veçantë të Bashkisë Shijak dhe kryetarit të saj, Elton Arbana.

Tapeti i kuq u shkel nga personalitete të njohura, të cilët shpalosën veshjet e tyre elegante, përpara se të drejtoheshin drejt sallës ku u mbajt eventi. Nën moderimin e këngëtares Eneda Tarifa, e cila e hapi mbrëmjen me një nga hitet e saj, spektakli vijoi me moderatorin Gent Lasku, bashkëshortin e saj, duke sjellë kimi dhe humor në skenë midis çiftit. Në fjalët përshëndetëse të mbajtura, nuk mungoi as fjala inkurajuese e nënkryetares së Bashkisë Shijak, Shpesa Domi, e cila shprehu mbështetjen për organizimin e më shumë eventeve të tilla.

Në skenë performuan artistë të talentuar, si Alis Kallaci, një nga zërat e rinj të zbuluar nga “X Factor”, ndërsa Lorenc Hasrama ngriti atmosferën me hitet e tij. Kleansa Susaj, e veshur me një fustan të kuq me pupla, shoqëroi modelet në sfilatën e tyre, duke sjellë një tjetër dimension të artit të modës në këtë event madhështor.

Një nga momentet kulmore të mbrëmjes ishte sfilata e fustaneve të nusërisë, ku modele ishin emra të njohur si Ema Andrea, Aulona Musta, Dasara Karaiskaj së bashku me vajzën e saj, si dhe Oregsa Zaimi. Por surpriza më e madhe erdhi kur komediani Eglein Laknori doli në pasarelë i veshur si një nuse, krah aktores Rita Lati, e cila me aktrimin dhe mimikat e saj shkaktoi të qeshura të shumta tek të pranishmit.

Sfilata u përshëndet gjithashtu nga videomesazh i Parashqevi Simakut dhe Elton Ilirjanit tashmë si dy emra të pandarë të cilët dhanë këshillat dhe falenderimet e tyre.

Mbrëmja u përmbyll me shpalljen e Manuela Palit si modelja më e mirë, e cila do të ketë mundësinë të konkurrojë në Javën e Modës në Milano, një hap i rëndësishëm për karrierën e saj në industrinë ndërkombëtare të modës.

International Fashion Week Albania në Shijak dëshmoi edhe një herë se Shqipëria po bëhet një qendër e rëndësishme e modës dhe spektaklit, duke sjellë ngjarje që jo vetëm promovojnë talentin vendas, por edhe e vendosin atë në hartën ndërkombëtare të modës.