Ajo vjen nga Parisi në Tiranë me shfaqjen e saj, duke u bërë pjesë e festivalit teatror “Mediums” drejtuar nga Ema Andrea. Bëhet fjalë për artisten Lee Dong, e cila ka prezantuar para publikut shqiptar në teatrin “Metropol” shfaqjen “Cowboy”.

Pjesa ‘rrëfen’ jetën e një gruaje në një botë maskilizmi të ashpër. Dong hyn brenda botës së personazhit dhe e tregon historinë e saj me habi, duke kujtuar tmerret me zgjuarsi të pafajshme, sikur këto gjëra i ndodhin çdo vajze.

Artistja e zhvesh jetën e saj dhe na bën për të qeshur përballë më të keqes. Triumfi i saj është shpërblim i nevojshëm. Lee Dong është aktore, mësuese, regjisore dhe shkrimtare, e cila jeton në Paris.

Ajo u diplomua në degën teatër në Universitetin e Ëest Virginia, SHBA dhe nga Jacques Lecoq International School në Paris.

Nga viti 2018 deri në 2020, ajo performoi në “Le Banquet” nga Mathilda May, me të cilin fitoi çmimin “Les Molieres”. Në ekran, Lee ka punuar me një numër të madh regjisorësh, duke përfshirë dhe Julie Delpy, Luc Besson, Antoine Garceau dhe Cedric Klapisch. Lee figuron në Dix Pour Cent në Netflix dhe në Gutys me Hilary Clinton në Apple TV.

Festivali i teatrit bashkëkohor i titulluar “Mediums” është një ngjarje kulturore që mbledh artistë e grupe teatrore dhe synon të kthehet në një nismë vjetore, duke e vendosur Tiranën dhe Shqipërinë çdo vit në dinamikat e artit bashkëkohor.