Nga Elvis Hila 

Folklori shqiptar i sjellë përmes ngjyrave “rrëfehet” në ekspozitën personale të piktorit nga Kosova, Xhevdet Spahia, të çelur në Galerinë e Arteve të qytetit të Lezhës. Autori, me profesion mësues, zgjodhi pikërisht 7 Marsin për takimin e rradhës me publikun, si një datë domethënëse për të, që bën bashkë dy nga pasionet e tij: mësimdhënien dhe pikturën.

“Në 7 mars e vendosa datën për arsye se 44 vjet punova në arsim. Gjatë asaj kohe hapja herë pas here ekspozita personale, herë me shokë, kolegë të punës e herë me nxënës. Nuk desha ta prish atë traditë dhe thashë ta hap edhe sivjet këtë ekspozitë në Lezhë”, tha Xhevdet Spahia, piktor.

Në ceremoninë e hapjes morën pjesë artistë, kritikë arti dhe përfaqësues të institucioneve lokale.

“Unë e shoh edhe si një shenjë respekti që i bën qytetit tonë, se ne kemi nevojë për transferim vlerash mes qyteteve tona, aq më tepër kur vjen për një qytet mjaft të dashur për ne, siç është Gjakova. Ekspozita e tij nuk bërtet. Është ekspozitë që shpresh dashurinë e tij për kostumet dhe traditën”, tha Pashk Përvathi, piktor.

“Racional në ngjyra, me personazhe sharmante, në qëndrimin antropologjik të racës shqiptare me histori të hershme e me ruajtjen e traditave kulturore”, tha Ymer Metaliaj përgjegjës i galerisë së arteve të Lezhës.

Ekspozita do të qëndrojë e hapur për vizitorët për disa ditë më radhë.