Xhamia e Plumbit pritet të jetë gati për besimtarët në muajin maj, ndërsa aktualisht po kryhen ndërhyrje me karakter restaurues dhe konservues në objekt. Ministri i Ekonomisë, Kulturës dhe Inovacionit Blendi Gonxhja ishte këtë të mërkurë në Shkodër, për të inspektuar nga afër punimet.

Përmes një postimi në rrjetet sociale ai shkruan, se projekti për restaurimin e xhamisë synon që t’i rikthejë vlerat historike këtij monumenti.

‘Restaurimi i Xhamisë së Plumbit, Shkodër. Një projekt që synon të rikthejë plotësisht vlerat historike dhe arkitekturore të këtij monumenti unik, duke ruajtur identitetin dhe trashëgiminë tonë kulturore’, shkruan ai.

Ndërhyrjet restauruese në xhaminë e Plumbit konsistojnë në çlirimin e objektit nga ndërhyrjet e gabuara ndër vite, si: përdorimi pa kriter i suvasë së çimentos, hidroizolimi dhe realizimi i veshjes me plumb i kupolave dhe qemerëve.

Restaurimi pritet të përfshijë edhe elementët dekorativë si kolonat, minaren, projekti i të cilës duhet të plotësohet me elementë dhe studim konstruktiv përsa i përket qëndrueshmërisë së saj, si dhe përforcimi i themeleve dhe realizimi i sistemit të drenazhit.

E ndërtuar më 1773-1774, Xhamia e Plumbit është monument kulture i kategorisë së parë dhe është xhamia osmane më e madhe në të gjithë Shqipërinë.