Prada ka arritur një marrëveshje për të blerë Versace për 1.25 miliardë euro, në një hap që shënon bashkimin e dy prej emrave më të fuqishëm të modës luksoze italiane. Marrëveshja përfshin blerjen e plotë të Versace nga kompania amerikane Capri Holdings, e cila zotëron gjithashtu Michael Kors dhe Jimmy Choo.
Sipas Pradës, shtimi i Versace-s, i njohur për estetikën e tij të guximshme dhe të dallueshme, përbën një zgjerim të natyrshëm dhe plotësues të portofolit të saj, i cili përfshin tashmë markat Prada dhe Miu Miu. Edhe pse u ble për 2 miliardë euro nga Capri në vitin 2018, Versace ka hasur vështirësi në epokën e “luksit të qetë”, ku stilet më të thjeshta janë bërë më të preferuara.
Versace u themelua në Milano më 1978 nga Gianni Versace dhe që nga vrasja e tij në vitin 1997, marka është drejtuar nga motra e tij Donatella, e cila dha dorëheqjen muajin e kaluar pas gati 30 vitesh në krye.
Prada do ta financojë blerjen përmes një huaje të re prej 1.5 miliardë eurosh, të përbërë nga një kredi 1 miliardë euro dhe një linjë lehtësie prej 500 milionë euro. Transaksioni pritet të mbyllet në gjysmën e dytë të vitit 2025.
Së fundmi, Prada ka fituar ndikim të madh në tregun e luksit falë rritjes së kërkesës për stilin e saj minimalist, veçanërisht në markën Miu Miu. Në vitin financiar që përfundoi më 31 dhjetor, kompania raportoi të ardhura neto prej 5.4 miliardë euro, një rritje prej 17% nga një vit më parë.
CEO i Pradës, Andrea Guerra, e cilësoi blerjen si “një hap tjetër në evolucionin e grupit”, duke shtuar se Versace ka “potencial të madh, por do të kërkojë kohë, fokus dhe durim për t’u rilançuar”.
Nga ana tjetër, Capri Holdings deklaroi se shitja do të përmirësojë bilancin e saj dhe do të lehtësojë investimet në markën Michael Kors.
Ekspertja e mallrave luksoze në Morningstar, Jelena Sokolova, tha se kjo lëvizje “ka kuptim në aspektin financiar dhe kohor”, duke shtuar se “Versace ka nevojë për investime të reja për t’u rikthyer fuqishëm, çka mund të ndikojë përkohësisht te fitimet e Pradës në planin afatshkurtër”.