Sonte në orën 21:00, në një transmetim të drejtpërdrejtë në kanalin zyrtar të RevoKult në YouTube, publiku do të ketë mundësinë të ndjekë një episod të posaçëm të këtij podcasti, që sjell në qendër një nga emrat më të përfolur të fushatës zgjedhore në Durrës: kandidatin e Partisë Demokratike në listat e hapura, Ndrec Pjetri.

Me një angazhim të gjatë në jetën publike dhe politike, ku përfshihen edhe disa pozicione drejtuese në strukturën e PD, Ndrec Pjetri hyn në këtë garë elektorale me një profil të qartë politik. Kjo është hera e parë që ai përballet drejtpërdrejt me votën qytetare në një sistem me lista të hapura, një model që i jep qytetarëve fuqinë për të zgjedhur individin, jo vetëm partinë.

Episodi i mbrëmjes së sotme nuk është thjesht një intervistë. Është një ftesë për dialog, për ballafaqim të ideve, për përgjigje të drejtpërdrejta mbi temat që i shqetësojnë realisht qytetarët e Durrësit.

Cilat janë prioritetet e tij për qytetin bregdetar? Si e përkthen ai eksperiencën politike në projekte konkrete për zhvillim, për të ndalur largimin masiv të të rinjve nga qyteti? Çfarë e bën atë ndryshe nga kandidatët e tjerë në këtë garë? A përfaqëson ai një alternativë të besueshme dhe të re?

Në këtë episod pritet që Ndrec Pjetri të japë përgjigje të qarta për një sërë çështjesh që kanë dalë në pah gjatë fushatës. Përmes këtij formati të hapur dhe spontan, RevoCast synon t’u japë votuesve durrsakë një pasqyrë më të thelluar mbi kandidatin dhe vizionin e tij për qytetin. Ky është një hap më shumë drejt transparencës dhe ndërgjegjësimit qytetar në një fushatë që po zhvillohet në një klimë të ndjeshme politike dhe shoqërore.

Sot, ora 21:00. Mos e humbisni!