Në një deklaratë të qartë dhe pa ekuivok, kandidati i opozitës, Ndrec Pjetri, ka shprehur mbështetje të plotë për veprimet e SPAK-ut. Ai e konsideron këtë institucion si një nga goditësit më të fortë ndaj qeverisë Rama në vitet e fundit, duke nënvizuar se aksioni i drejtësisë është i domosdoshëm.

Pjetri theksoi se besimi i tij ndaj SPAK-ut nuk lidhet me përkatësinë politike të personave që preken nga hetimet, por me parimin se askush nuk është mbi ligjin. Ai u shpreh se kushdo që ka gabuar, pavarësisht ngjyrës politike, duhet të përballet me pasojat dhe të marrë atë që i takon sipas ligjit.

Kur u pyet nëse do ta kishte të njëjtën qëndrim nëse arrestimet do të përfshinin edhe figura nga opozita, Pjetri mbajti një qëndrim koherent: “Nëse e meritojnë, le të ndëshkohen”. Ai refuzoi të mbrojë çdo qëndrim me standarde të dyfishta, duke theksuar se drejtësia duhet të jetë njësoj për të gjithë. “S’mund të flasim për të njëjtin institucion me dy standarde.”, tha ai.

Sidoqoftë, sipas tij, është e vështirë të imagjinohet se çfarë mund të hetohet brenda Partisë Demokratike, pasi që nga viti 2013 opozita nuk ka pasur asnjë lloj pushteti ekzekutiv. Kjo, sipas Pjetrit, është edhe një dëshmi e boshllëkut të forcës politike në vendimmarrjen publike gjatë dekadës së fundit.

Deklaratat e tij vijnë në një kohë kur SPAK-u po intensifikon hetimet për korrupsion në nivelet e larta të qeverisjes, duke trazuar jo vetëm skenën politike, por edhe opinionin publik. Qëndrimi i Pjetrit i jep zë një pjese të opozitës që kërkon të ndjekë një vijë të qartë ndaj drejtësisë: jo selektive, por të barabartë për të gjithë.

Biseda e plotë:

Aldo: Ke besim tek ajo që po bën SPAK-u?

Ndrec: Po, me çfarë ka bërë deri më sot, unë jam plotësisht besimplotë. Mendoj se ka dhënë goditjen më të fortë ndaj qeverisë Rama.

Aldo: E sheh vetëm si një goditje ndaj qeverisë Rama, apo mendon se vendimet e SPAK-ut kanë ndikuar edhe tek opozita?

Ndrec: Kushdo që ka bërë gabime, le të përballet me drejtësinë dhe të marrë atë që i takon.

Aldo: Pra, nuk do të flisje kundër SPAK-ut nëse do të kishte arrestime edhe brenda opozitës?

Ndrec: Nëse e meritojnë, padyshim që jo. S’mund të flasim për të njëjtin institucion me dy standarde. Nuk është në rregull që kur godet PS-në të themi “mirë bën”, por kur godet PD-në të themi “keq bën”. Kjo nuk qëndron. Por, për hir të së vërtetës, cilët nga PD-ja do të godasë? Ne s’kemi më pushtet që nga viti 2013!