Qendra për Hapje dhe Dialog (COD) ju fton në ekspozitën më mbresëlënëse në Tiranë, të titulluar “Nga bohemizmi te përjetësia”, me vepra nga Amadeo Modigliani, Henri Matisse, Edgar Degas, Tamara de Lempicka, Kees van Dongen etj.
Ekspozita vjen në bashkëpunim me Fondacionin MTA dhe Ambasadën e Izraelit.
Ceremonia zyrtare do të mbahet më 19 maj 2025, në orën 19:00, në hollin protokollar të Kryeministrisë.
Veprat artistike në ekspozitë pasqyrojnë ndërgjegjen kolektive të epokës, stilin e jetës dhe momentin historik, kryesisht në Francë, por edhe në Evropën Perëndimore dhe Lindore, në Amerikën Latine dhe në Shtetet e Bashkuara të Amerikës.
Koleksioni paraqet një grup të tërë artistësh, pa të cilët do të ishte e pamundur të imagjinohej historia e Artit Modern, siç janë Fovistët—Louis Valtat, Maurice Vlaminck, Henri Manguin, Auguste Herbin, Jean Puy, Albert Gleizes dhe Jean Metzinger.
Holandezi Kees van Dongen dhe italiani Amedeo Modigliani ishin të lidhur ngushtë me Francën dhe përfaqësohen me kryeveprat e tyre: van Dongen me një portret spektakolar të Marcelle Léoni, dhe Modigliani me portretin e suedezes së re, Annie Bjarne.
Skulpturat zënë gjithashtu një vend të veçantë në koleksion, duke filluar me bronzin e bukur Vallzuesja e Vogël Katërmbëdhjetëvjeçare, e veshur me tutu prej pëlhure, nga Edgar Degas, i cili krijoi shumë kryevepra me temën e baletit.
Një eksperiment skulpturor i guximshëm nga Henri Matisse—Aurora prej suva të lyer me bronz—është një vepër e rëndësishme në koleksion.
Diversiteti i koleksionit pasurohet nga grupi i shquar i artistëve avangardë hungarezë, përfshirë Bela Kadar, Lajos Tihani, Csaky dhe Hugo Scheiber. Edhe përfaqësuesit e avangardës gjermane janë të shumtë: Hanns Bolz, Henrich Nauen, Max Ackermann, Friedrich Gotsch, Boris Kleint, Oscar Moll dhe e famshmja Gabrielle Münter.
