Në zemër të Shijakut, në sheshin “29 Nëntori”, mbrëmjen e 1 qershorit, u zhvillua eventi madhështor sportiv “Shijak Boxing Fight Nights 2”, i kthyer tashmë në një traditë vjetore për qytetin.

Organizuar nga Bashkia Shijak në bashkëpunim me Titans Fights, ky spektakël sportivo-kulturor solli në ring ndeshje boksi dhe kickboksi me pjesëmarrjen e sportistëve nga Shqipëria, Kosova, Anglia, Franca, Italia, Portugalia, Nepali dhe Senegali. Nën ritmin e emocioneve dhe shpirtit garues, mbrëmja nisi me katër ndeshje për moshat e reja dhe vijoi me 12 duele të forta midis kampionëve të peshave 60-92 kg.

Në fjalën e tij përshëndetëse, kryetari i Bashkisë Shijak, Elton Arbana, theksoi rëndësinë e këtij eventi për komunitetin dhe brezat e rinj:

“Është kënaqësi dhe nder i veçantë të mirëpresim në Shijak një aktivitet që i kushtohet forcës, disiplinës dhe shpirtit garues. Sot nuk jemi thjesht dëshmitarë të ndeshjeve, por të një takimi vlerash. E them me krenari që Shijaku është një qytet mikpritës që e do sportin dhe artin.”

Arbana falënderoi trajnerët Enton Kikrri dhe Fred Shoshi, si dhe uroi mirëseardhjen e sportistëve ndërkombëtarë.

Trajneri dhe organizatori Enton Kikrri theksoi rëndësinë që ky event ka për nxitjen e të rinjve drejt sportit:

“Kemi përfshirë ndeshje boksi dhe kickboksi. Janë sfida shumë të forta. Kemi pjesëmarrës nga Anglia dhe vende të tjera. Organizime të tilla ndikojnë drejtpërdrejt në rritjen e masivitetit sportiv. Sot kemi 4 ndeshje për shkollarët dhe 12 të tjera me kampionë ndërkombëtarë. Është një nga organizimet më të fuqishme të deritanishme.”

Pjesë e ringut ishte edhe boksieri më i vogël i mbrëmjes, 8-vjeçari Hegel Kërtusha, i cili ndau emocionet e para pas sfidës së tij:

“Kam 4 vite që merrem me këtë sport. Në fillim ka qenë e vështirë, por tani është më e lehtë. Dua të merrem gjithmonë me boks. Ishte hera ime e parë në ring dhe pata pak emocione, por ndeshja ishte e bukur.”

Mes sportistëve të spikatur të natës ishte edhe James “The Flames”, shqiptaro-britaniku nga Londra, fitues në njërën prej përballjeve kryesore:

“Quhem James The Flames, vij nga Londra dhe jam shqiptaro-britanik. Kam jetuar gjithë jetën në Angli, nëna ime është angleze dhe babai shqiptar. Ende nuk e flas mirë shqipen, por po e mësoj gradualisht. Ndeshja e sotme ishte e fortë. Kundërshtari im ishte i zoti dhe ndoshta në të ardhmen do të bëhet edhe më i fortë. Nuk ishte e lehtë të fitoja, sidomos kur më shtynte në cep të ringut – atëherë e ndjeja sa forcë kishte. Tirana, Golemi, Shijaku… Shqipëria është një vend i mrekullueshëm, kudo që hedh sytë sheh bukuri. Do të rikthehem patjetër!”

Mbrëmja nuk solli vetëm përplasje grushtash, por edhe një atmosferë festive me valle tradicionale shqiptare dhe një program artistik, ku i ftuar special ishte aktori dhe këngëtari Bes Kallaku.

Në këtë natë të veçantë sporti, nuk munguan as figurat e njohura si ish-kampioni absolut Kreshnik Qato, presidenti i Federatës së Boksit Florend Kalivopuli, si dhe presidenti i Komitetit Olimpik Kombëtar Shqiptar Fidel Ylli.

“Shijak Boxing Fight Nights 2” konfirmoi edhe një herë se boksit në Shqipëri i ka ardhur koha të ngjitet fuqishëm në ringun ndërkombëtar, ndërsa Shijaku, me mikpritjen e tij, bëhet një pikë referimi për sportin dhe talentet e së ardhmes.