Mbrëmjen e djeshme, Shtëpia e Evropës në Tiranë u shndërrua në një kinema të veçantë, ku ekranin nuk e mbushën thjesht imazhe, por histori që kërkojnë të dëgjohen. Të rinj të talentuar sollën para publikut filma të shkurtër që trajtojnë tematika të thella dhe shpesh të anashkaluara, si trafikimi i qenieve njerëzore, qëndresa e grave gjatë diktaturës dhe sfidat e përditshme ndaj stereotipeve gjinore.

Këto krijime janë fryt i projektit të financuar nga Bashkimi Evropian, “Breaking the Moulds – Shaping the Future”, i cili ka për qëllim fuqizimin e të rinjve në sektorin e medias dhe audiovizualit. Përmes tregimeve të tyre, këta regjisorë të rinj denoncojnë padrejtësinë, nxjerrin në pah guximin dhe japin një thirrje të fortë për një media më etike dhe gjithëpërfshirëse në Shqipëri.

Një rol të rëndësishëm në këtë proces e ka luajtur organizata Albanian Women in Audiovisual, në bashkëpunim me SCiDEV, të cilat kanë ofruar trajnim, mentorim dhe mbështetje të vazhdueshme gjatë gjithë rrugëtimit krijues të pjesëmarrësve.

Ambasadori i BE-së në Shqipëri, z. Silvio Gonzato, në fjalën e tij vlerësoi guximin dhe angazhimin e të rinjve:

“Jam krenar të shoh që BE-ja po fuqizon gazetarë dhe regjisorë të rinj për të treguar histori të fuqishme. Nëpërmjet këtyre tregimeve, ata po ndihmojnë në ndryshimin e narrativës, jo vetëm për gratë në media, por edhe për gratë në shoqëri. Mesazhi im për ta: Vazhdoni të krijoni, të sfidoni dhe të mbështesni njëri-tjetrin. BE-ja do të vazhdojë të jetë në krahun tuaj.”

Ngjarja nuk ishte vetëm një prezantim filmash, por një thirrje për reflektim, për mbështetje ndaj zërave të rinj dhe për ndërtimin e një shoqërie ku çdo histori ka të drejtë të thuhet.