Të dielën, më 18 maj 2025, në orën 18:00, Qendra Kulturore e Fëmijëve në Durrës mirëpriti një ngjarje të veçantë kulturore dhe njëkohësisht humanitare: nxënësit e klasës së III-B të shkollës 9-vjeçare “Marie Kaçulini” ngjitën në skenë pjesën teatrale “Sonte nuk jam vetëm”, një ndërmarrje sociale që ngërthen ndjeshmëri, art dhe solidaritet.

E ideuar dhe organizuar nga Alma Dema, shfaqja vjen si një nismë e parë e këtij lloji në qytet, me synim të qartë për të ndërgjegjësuar mbi ndjeshmërinë që kërkon shoqëria përballë fëmijëve jetimë dhe për të mbështetur fëmijët talasemikë përmes të ardhurave nga shitja e biletave.

Historia rrëfen vogëlushen Dea, një vajzë e mbetur jetime, e cila kalon vetëm natën e ditëlindjes në një dhomë, pasi të gjithë shokët e saj janë birësuar. E mbushur me trishtim dhe ndjesi vetmie, Dea përjeton një mbrëmje që ndryshon kur personazhe nga bota e përrallave vijnë për ta gëzuar dhe për ta bërë të ndihet e dashur: Kësulëkuqja dhe gjyshja e saj, Borëbardha dhe shtriga, Piter Pani dhe ujku sjellin jo vetëm dhurata, por edhe ngrohtësinë e fantazisë dhe shpresës.

Skenat janë ndërtuar me finesë, humor dhe lojë të pastër fëminore, duke përcjellë një mesazh të fuqishëm për përfshirjen sociale dhe kujdesin ndaj fëmijëve në nevojë. Prapaskenat dhe organizimi janë realizuar me përkushtim nga mësueset Enkeleda Shahini, kujdestare e klasës III-B, dhe Denisa Gajda, mësuese e edukimit fizik.

Shfaqja “Sonte nuk jam vetëm” erdhi si një shembull frymëzues i edukimit përmes artit dhe solidaritetit, duke dëshmuar se edhe fëmijët mund të jenë protagonistë të ndryshimit shoqëror dhe mbështetjes ndaj bashkëmoshatarëve të tyre në vështirësi. Nëpërmjet kësaj shfaqjeje, qyteti i Durrësit dëshmon një hap të rëndësishëm drejt kultivimit të ndjeshmërisë sociale që në moshë të hershme.