Ronela Hajati ka nisur zyrtarisht numërimin mbrapsht për projektin e saj më të ri muzikor. Këngëtarja ka tërhequr vëmendjen e ndjekësve me një postim ku shfaqet fjala “ZIA”, ndërsa më pas, përmes një InstaStory, ka konfirmuar se bëhet fjalë për këngën e saj të re, duke shkruar: “Favourite song coming soon.”

Artistja ka bërë të ditur se “ZIA” do të publikohet këtë të enjte, ndërsa pritshmëritë janë rritur edhe më shumë pas videos promovuese që shoqëron projektin.

Në teaser-in e publikuar, Ronela shfaqet në një skenë me atmosferë të errët dhe kinematografike. Ajo duket e mbështetur mbi timonin e një makine të dëmtuar, me xhamin e përparmë të krisur, ndërsa në fytyrë vërehen shenja të lehta të përplasjes, përfshirë edhe një vijë të hollë gjaku pranë hundës. Pamjet krijojnë një ndjesi tensioni dhe lënë të kuptohet se videoklipi do të sjellë një histori me ngarkesë të fortë emocionale.

Megjithëse Ronela nuk ka zbuluar ende detaje të tjera rreth këngës, postimet e saj kanë ngjallur menjëherë reagime në rrjetet sociale. Tashmë mbetet vetëm të pritet dita e enjte për të parë se çfarë fshihet pas titullit misterioz “ZIA”, që artistja e ka cilësuar si një nga këngët e saj të preferuara.