Prishtina po bëhet gati për një tjetër edicion spektakolar të Sunny Hill Festival, që do të mbahet nga 31 korriku deri më 2 gusht 2026, duke sjellë në Kosovë disa nga emrat më të mëdhenj të muzikës pop dhe elektronike në botë. Sipas emrave të konfirmuar dhe artistëve që lidhen ngushtë me historinë e festivalit, ky pritet të jetë një nga edicionet më të forta që ka organizuar ndonjëherë Sunny Hill.
Në krye të posterit qëndron superylli amerikan Katy Perry, një nga artistet më të suksesshme të muzikës pop me dhjetëra hite globale. Prania e saj konsiderohet një nga goditjet më të mëdha të festivalit për vitin 2026 dhe pritet të tërheqë mijëra vizitorë nga e gjithë Europa.
Por surprizat nuk mbarojnë këtu. Në skenën elektronike do të zbarkojnë emra që aktualisht dominojnë festivalet më prestigjioze në botë. Mes tyre janë PAWSA, si dhe dy figurat kryesore të kolektivit fenomen Keinemusik, Adam Port dhe Rampa, artistë që prej muajsh po kryesojnë listat e eventeve më ekskluzive elektronike në Europë dhe Lindjen e Mesme.
Një tjetër emër që lidhet fort me Sunny Hill dhe që pritet të jetë ndër figurat më të komentuara të festivalit është edhe Martin Garrix, një nga DJ-të më të famshëm në planet dhe një artist që ka qenë ndër atraksionet më të mëdha të historisë së festivalit.
Line-up-i përfshin gjithashtu emra si Carlita, Seth Troxler dhe Manifest, ndërsa organizatorët kanë paralajmëruar se lista e artistëve do të zgjerohet me njoftime të reja në javët e ardhshme.
Përtej muzikës, Sunny Hill 2026 pritet të kthehet në një magnet turistik për Kosovën. Festivali ka arritur të vendosë Prishtinën në hartën europiane të eventeve muzikore, duke sjellë çdo vit dhjetëra mijëra vizitorë dhe duke gjeneruar një atmosferë që rivalizon festivalet më të njohura të rajonit.
Me Katy Perry në krye të posterit dhe me emra si PAWSA, Adam Port, Rampa e Martin Garrix që garantojnë një maratonë elektronike të nivelit botëror, Sunny Hill 2026 po projektohet që tani si një nga ngjarjet më të mëdha të showbiz-it dhe muzikës në Ballkan këtë verë.