Gjatë një interviste me gazetarin Aldo Mustafa, kandidati për deputet i Partisë Demokratike në qarkun e Durrësit, Ndrec Pjetri, dha një deklaratë të drejtpërdrejtë lidhur me përgjegjësinë politike ndaj qytetarëve. I pyetur se çfarë do të ndodhte nëse, pas ardhjes në pushtet, premtimet e bëra nga ai dhe nga “Aleanca Për Shqipërinë Madhështore” nuk do të realizoheshin, Pjetri u shpreh qartë:

“Jo! Nëse premtimet që ka dhënë Sali Berisha dhe koalicioni ‘Për Shqipërinë Madhështore’ nuk realizohen, atëherë të jeni të sigurt se do të më dëgjoni të flas kundër në Parlament. Dhe e dyta, unë nuk do të dal të kërkoj më votë për Partinë Demokratike pas katër vitesh.”

Ky qëndrim përfaqëson një angazhim të rrallë moral dhe politik, jo vetëm që Pjetri merr përsipër të mbajë përgjegjësi për zbatimin e programit, por shkon më tej, duke u zotuar se do të reagojë publikisht dhe do të distancohet nga partia që përfaqëson nëse ajo tradhton besimin e qytetarëve.

Deklarata u bë në kuadër të fushatës zgjedhore, në një kohë kur qytetarët kërkojnë jo vetëm premtime të bukura, por edhe garanci për llogaridhënie. Në një realitet ku shpesh mungon përgjegjësia politike, angazhime të tilla përbëjnë një standard të ri komunikimi dhe morali në skenën publike.

Ndrec Pjetri ka hyrë në politikë me një mesazh të qartë: politika duhet të rikthehet në shërbim të njeriut dhe fjala e dhënë duhet të vlejë më shumë se çdo retorikë elektorale. Në këtë frymë, ai është zotuar se nuk do të jetë vetëm një zë që ndjek vijën e partisë, por një përfaqësues që ruan ndërgjegjen dhe dinjitetin e tij deri në fund të mandatit.

Në një klimë të ngarkuar me skepticizëm dhe zhgënjim, qytetarët mund të kenë dëgjuar shumë premtime, por ajo që e veçon deklaratën e Pjetrit është përkushtimi që ai merr jo vetëm për të vepruar, por edhe për të mos heshtur në rast dështimi, një akt që mund të shërbejë si shembull për gjithë klasën politike dhe që Pjetri e ka kryer edhe më herët gjatë krizës së përçarjes së Partisë Demokratike.