Qyteti i Shijakut pritet të kthehet në një skenë të vërtetë spektakli më 22 korrik, kur trupa e njohur e spektaklit të humorit “Portokalli” do të ngjitet në skenë në qendër të qytetit, për një mbrëmje që premton të jetë e paharrueshme për të gjithë banorët dhe vizitorët.

Nën qiellin e verës dhe në zemër të Shijakut, nën kujdesin e veçantë të Bashkisë Shijak dhe kryetarit të saj, z. Elton Arbana, “Portokalli” do të sjellë jo vetëm humorin e saj karakteristik, por edhe muzikë live, numra të rinj dhe shumë surpriza për publikun. Aktorët më të dashur të këtij spektakli do të ngjiten në skenë me rolet dhe personazhet që kanë bërë për vete publikun shqiptar prej vitesh, por edhe me interpretime të reja të përgatitura enkas për këtë mbrëmje.

Pjesëmarrja në këtë event është e hapur për të gjithë dhe falas, si një dhuratë artistike për komunitetin, në një periudhë kur qyteti kërkon më shumë gëzim, energji dhe bashkim.

Portokalli ka treguar ndër vite se është një ndër programet më të ndjekura për faktin se i drejtohet një audience të gjerë, duke kombinuar satirën, humorin e bardhë dhe energjinë skenike me mesazhe shoqërore që lënë gjurmë.

Nëse doni të kaloni një mbrëmje ndryshe, plot të qeshura, muzikë, ritëm dhe pozitivitet, shënoni në kalendar: 22 korrik, në qendër të qytetit të Shijakut, aty ku spektakli “Portokalli” zbret për t’u bërë pjesë e jetës së përnatshme të komunitetit.