Vetëm pak përpara hapjes së Festivalit të Këngës në Radio Televizionin Shqiptar, atmosfera e përgatitjeve është në kulmin e saj. Edicioni i 64-t i këtij eventi të shumëpritur do të zhvillohet më 17, 18, 19 dhe 20 dhjetor, duke sjellë për publikun katër mbrëmje radhazi të mbushura me muzikë, emocione dhe spektakël në skenën e Pallatit të Kongreseve.

Në këtë fazë intensive të punës, prezantuesit e festivalit, Arilena Ara dhe Salsano Rapi, janë përqendruar tërësisht te provat e skenarit. Prej disa ditësh, dyshja është “izoluar” për të punuar me kujdes mbi rrjedhën e netëve festive, ritmin e prezantimit dhe detajet që i japin jetë spektaklit.

Nën drejtimin e skenaristit të Fest 64, Koloreto Cukali, Arilena dhe Salsano po analizojnë çdo element të moderimit, ashtu siç dëshmohet edhe nga momentet e ndara në fotografi. Qëllimi është i qartë: një prezantim i balancuar, elegant dhe energjik, në harmoni të plotë me frymën e festivalit.

Teksa provat po shkojnë drejt përmbylljes dhe emocionet shtohen nga dita në ditë, gjithçka duket gati për rikthimin e Festivalit të Këngës në RTSH, një nga ngjarjet më të ndjekura dhe më të dashura të fundvitit për publikun shqiptar.

Burimi: Kryefjala.com