Ceremonia e 98-të e Academy Awards u zhvillua më 15 mars 2026 në Dolby Theatre në Los Angeles, duke mbledhur yjet më të mëdhenj të industrisë së filmit për të festuar arritjet më të rëndësishme të vitit. Mbrëmja u prezantua nga komediani Conan O’Brien, i cili solli humor dhe satirë gjatë gjithë ceremonisë.
Filmi që dominoi ceremoninë ishte One Battle After Another, i cili fitoi çmimin kryesor ‘Fotografia më e mirë’dhe disa kategori të tjera të rëndësishme. Regjisori Paul Thomas Anderson u vlerësua me çmimin ‘Regjisori më i mirë’ duke e bërë filmin një nga fituesit më të mëdhenj të mbrëmjes.
Në kategoritë e aktrimit, Michael B. Jordan fitoi ‘Aktori më i mirë’ për rolin e tij në filmin Sinners, ndërsa Jessie Buckley u shpall ‘Aktorja më e mirë’ për performancën e saj në Hamnet. Çmimi për ‘Aktorja më e mirë mbështetëse’ shkoi për Amy Madigan për rolin e saj në Weapons.
Ceremonia përfshiu edhe performanca muzikore dhe homazhe për figura të rëndësishme të kinemasë që kanë ndërruar jetë gjatë vitit të fundit. Një nga momentet më emocionale ishte segmenti In Memoriam, që nderoi artistët e ndjerë të industrisë së filmit.
Filmat ndërkombëtarë dhe animacionet patën gjithashtu një prani të fortë. Filmi norvegjez Sentimental Value fitoi ‘Filmi më i mirë ndërkombëtar’, ndërsa animacioni KPop Demon Hunters u shpall ‘Filmi i animuar më i mirë’.
Gjatë ceremonisë pati edhe mesazhe sociale dhe politike nga disa fitues dhe prezantues, të cilët folën për çështje globale dhe sfidat e industrisë së filmit. Pavarësisht toneve serioze në disa momente, ceremonia u karakterizua nga atmosfera festive, moda spektakolare në tapetin e kuq dhe festimi i kreativitetit në kinematografi.
Lista e fituesve
Filmi më i mirë
“One Battle After Another”
Aktori më i mirë
Michael B. Jordan, “Sinners”
Aktorja më e mirë
Jessie Buckley, “Hamnet”
Aktorja më e mirë mbështetëse
Amy Madigan, “Weapons”
Aktori më i mirë mbështetës
Sean Penn, “One Battle After Another”
Regjisori më i mirë
Paul Thomas Anderson, “One Battle After Another”
Kënga origjinale më e mirë
“Golden” nga “KPop Demon Hunters,” EJAE, Mark Sonnenblick, Joong Gyu Kwak, Yu Han Lee, Hee Dong Nam, Jeong Hoon Seon dhe Teddy Park
Muzika origjinale më e mirë
“Sinners,” Ludwig Göransson
Filmi i animuar më i mirë
“KPop Demon Hunters”
Filmi më i mirë ndërkombëtar
“Sentimental Value,” Norvegji
Dokumentari me metrazh të gjatë
“Mr. Nobody Against Putin”
Kasti më i mirë (Casting)
Cassandra Kulukundis, “One Battle After Another”
Tingulli më i mirë
Gareth John, Al Nelson, Gwendolyn Yates Whittle, Gary A. Rizzo dhe Juan Peralta, “F1”
Kinematografia më e mirë
Autumn Durald Arkapaw, “Sinners”
Skenari origjinal më i mirë
“Sinners,” Ryan Coogler
Skenari i adaptuar më i mirë
“One Battle After Another,” Paul Thomas Anderson
Filmi i shkurtër me aksion të drejtpërdrejtë
(barazim) “The Singers” dhe “Two People Exchanging Saliva”
Filmi i shkurtër i animuar
“The Girl Who Cried Pearls”
Filmi dokumentar i shkurtër
“All the Empty Rooms”
Efektet vizuale më të mira
Joe Letteri, Richard Baneham, Eric Saindon dhe Daniel Barrett, “Avatar: Fire and Ash”
Dizajni i produksionit më i mirë
Tamara Deverell dhe Shane Vieau, “Frankenstein”
Montazhi më i mirë
Andy Jurgensen, “One Battle After Another”
Grimi dhe stilimi më i mirë
Mike Hill, Jordan Samuel dhe Cliona Furey, “Frankenstein”
Kostumografia më e mirë
Kate Hawley, “Frankenstein”
Në janar, Golden Globe përfshiu shenja dhe mesazhe politike pak ditë pas vrasjes së Renee Good, në mes të trazirave në Minneapolis, por edhe në Oscar pati hapësirë për mosmarrëveshje dhe kritikë ndaj policisë kundër emigracionit nga presidenti Trump. Organizatat pas shenjave ‘Ice Out’ dhe ‘Be Good’, të cilat u mbajtën nga disa të famshëm gjatë sezonit të çmimeve për të protestuar kundër dhunës së agjentëve federalë kundër emigracionit, e shpërndanë mesazhin e tyre edhe në rrugët e Los Angelesit në prag të Oscar, duke projektuar slogane mbi Muzeun e Akademisë, mbi Loews Hollywood Hotel dhe mbi ndërtesa të tjera.
Të njëjtat mesazhe u shfaqën edhe mbi tapetin e kuq të Oscar. Ndër artistët që mbajtën shenjën ishte stilistja polake Malgosia Turzanska, e nominuar për punën e saj në “Hamnet” të Chloe Zhao. Ndërsa aktorja Glennon Doyle mbante në dorë një çantë me mbishkrimin “Fuck ICE” ndërsa pozonte pranë futbollistes Abby Wambach, e cila mbante një shenjë me mbishkrimin ICE OUT.
Fushata e paautorizuar tregon fraza si “ICE po ndërton një ushtri për të deportuar fqinjët tanë” dhe “po ndërton një shtet policor të ushqyer nga inteligjenca artificiale”. Disa mesazhe shfaqin fotot e Renee Good dhe Alex Pretti, dy qytetarë amerikanë të vrarë nga agjentët federalë në Minneapolis në janar 2026 gjatë operacioneve të kontrollit të emigracionit.
Shenja të tjera, të mbajtura nga producentja Elizabeth Woodward dhe aktorja Saja Kilani nga filmi palestinez “The voice of Hind Rajab”, kërkuan fundin e luftërave në Iran, Gaza, Ukrainë dhe Sudan me simbolin “Artists4Ceasefire” (Artistët për Armëpushim). Ndërsa Javier Bardem, i cili dorëzoi një çmim gjatë ceremonisë, kërkoi “Palestinën e lirë” dhe mbajti mbi xhaketë një mesazh kundër luftës, të njëjtin që kishte mbajtur vite më parë për luftën në Irak.
Çmimet Oscar janë ‘Super Bowl’-i i kinemasë. Pas muajsh të tërë me ceremoni çmimesh e tapete të kuq, gara e madhe e 16 marsit përzgjodhi filmat dhe aktorët që kanë shkëlqyer përgjatë vitit.
Por, ndërsa rolet e tyre i gjejnë aktorët në pozitat më të çuditshme dhe jo pak herë, të ndryshuar plotësisht, nata e çmimeve Oscar është një lloj thirrjeje për të zgjedhur veshjet më të spikatura të modës së lartë, shpesh për të lënë gjurmë në historinë e tapetit të kuq.
Këtë vit, yje si Teyana Taylor e Pedro Pascal zgjodhën Chanel, Demi Moore Gucci, Rose Byrne Dior, ndërsa Kate Hudson Armani Privé.
Anne Hathaway i besoi një fustani të zi me lule të Valentinos, një lloj homazhi edhe ndaj filmit “The Devil Wears Prada 2” që del në kinema këtë prill.