Protesta e studentëve dhe të rinjve, e nisur mesditën e së martës, 13 tetor, në Tiranë, është përshkallëzuar gjatë orëve të ditës në përplasje të dhunshme me policinë, dëmtime të godinave institucionale dhe zjarre në rrugë. Protestuesit kërkojnë ndryshime në arsim dhe kushte më të mira për studentët, ndërsa në tubim janë dëgjuar edhe thirrje për dorëheqjen e kryeministrit Edi Rama dhe ministres së Arsimit.
Situata u tensionua fillimisht para Ministrisë së Arsimit, ku protestuesit hodhën vezë, bojë dhe kapsolla drejt godinës. Më pas, disa prej tyre shkulën kangjella metalike dhe pllaka trotuari, duke goditur fasadën dhe thyer xhamat e institucionit. Policia ndërhyri me gaz lotsjellës dhe mjete ujëhedhëse, ndërsa pati shoqërime dhe persona të lënduar.
Gjatë pasdites, incidentet u përhapën në Rrugën e Durrësit dhe zonën e Mine Pezës, ku u ndezën vatra zjarri dhe u raportuan dëmtime të pronës private. Në mbrëmje, një pjesë e protestuesve u zhvendos drejt Bashkisë së Tiranës, ku pas hedhjes së gurëve u thye dera e hyrjes dhe disa protestues hynë në godinë. Në momentin e raportimit, përplasjet vijojnë të jenë të dhunshme.
Etapat e protestës:
– Ora 14:00 – Nis protesta. Studentët dhe të rinjtë mblidhen para Ministrisë së Arsimit, duke kërkuar kushte më të mira për arsimin dhe jetesën, si dhe duke artikuluar kërkesa për dorëheqje politike.
– Pas orës 14:00 – Përshkallëzimi para Ministrisë. Protestuesit hedhin vezë, bojë dhe kapsolla drejt godinës. Shkulen kangjella dhe pllaka trotuari, thyhen xhama dhe dëmtohet fasada e institucionit.
– Gjatë pasdites – Përplasje me policinë. Forcat e rendit përdorin gaz lotsjellës dhe autobotë me ujë me presion. Raportohen përleshje fizike, shoqërime protestuesish dhe persona të lënduar.
– Pas disa orësh protestë – Zjarre në Rrugën e Durrësit dhe Mine Pezë. Incidentet zhvendosen në rrugët përreth, ku raportohen djegie orendish, reklamash dhe tendash, si dhe dëmtime të pronës publike e private.
– Në mbrëmje – Hyrja me forcë në Bashkinë e Tiranës. Një grup protestuesish zhvendoset drejt godinës, hedh gurë dhe thyen derën e hyrjes. Disa prej tyre futen brenda, ndërsa policia ndërhyn për të rivendosur kontrollin.
– Gjatë mbrëmjes – Publikohet bilanci shëndetësor. Sipas Ministrisë së Shëndetësisë dhe Mirëqenies Sociale, 13 persona morën ndihmë mjekësore: tre protestues, dy përfaqësuese të medias, gjashtë efektivë policie dhe dy kalimtarë. Një nga kalimtarët u shtrua në spital, ndërsa tjetri mbeti nën monitorim.
– Aktualisht – Përplasjet vijojnë. Situata mbetet e tensionuar, me përplasje të dhunshme mes protestuesve dhe policisë. Bilanci përfundimtar i dëmeve, i të lënduarve dhe i personave të shoqëruar mbetet për t’u konfirmuar.